Митинг-реквием в память о жертвах Холокоста.
27 студзеня па ўсім свеце адзначаецца дзень памяці ахвяр Халакосту. Памяць пра жудасныя падзеі Другой Сусветнай вайны не павінна знікаць у часе. Мы абавязаны захаваць успаміны аб тых, хто загінуў у тыя жудасныя гады.
У гэты дзень у г.п. Мір ушанавалі памяць мірных жыхароў, расстраляных ля сценаў старажытнага замку.
Аддаць павагу загінуўшым прыйшлі настаўнікі і вучні 9-10 класаў нашай установы адукацыі.
Менавіта тут праз тры месяцы пасля акупацыі немцы, выконваючы нацысцкую праграму знішчэння яўрэяў, арганізавалі ў Міры гета. У яго перасялілі ўсіх яўрэяў мястэчка. У першай “акцыі” па знішчэнні яўрэйскага народа ў ліпені 1941 года было забіта 20 яўрэяў. Падчас другога масавага расстрэлу ў лістападзе 1941 года было забіта больш чым 1600 яўрэяў.
Першым слова трымаў старшыня Мірскага сельвыканкама Александр Маркевіч:
— У лістападзе 1941 года сапраўды на гэтым месцы было зверскі забіта амаль 1700 мірных жыхароў мястэчка Мір. Іх усіх проста сабралі, звезлі ў гэтую яму, дзе іх знішчылі. Мы заўжды захоўвалі памяць пра сваіх продкаў і ганарова неслі яе наперад. Я хачу папрасіць вас: любіце сябе, сваю сям’ю, сваю Радзіму. Зрабіце ўсё, каб на нашай зямлі не паўтарылася тое гора, якое было ў час Вялікай Айчынай.
Затым перад прысутнымі выступіла навуковы супрацоўнік ўстановы “Карэліцкі раённы краязнаўчы музей”, першы сакратар Карэліцкай раённай арганізацыі “Камуністычная партыя Беларусі” Марыя Белянова:
— Дзень памяці ахвяр Халакоста — час успомніць усе жахі вайны. У імя светлай памяці ўсіх, хто без віны загінуў у той жудасны час, мы павінны памятаць урокі гісторыі, у тым ліку Халакост, каб зберагчы мір і ніколі не дапусціць паўтарэння нацызма. Аб’яўленне 2023 года годам Міра і Стварэння актуальна як ніколі. Мір сёння — гэта галоўнае, для чаго неабходна жыць.
Мы будзем заўжды памятаць пра тых, хто цаной свайго жыцця падарыў нам права на мір і спакой.
Усіх, хто загінуў на той страшнай вайне, ушанавалі хвілінай маўчання.
Пасля мітынгу ідэалагічны актыў раёна накіраваўся ў Мірскі замак, дзе арганізавана выстаўка, прысвечаная памяці яўрэяў, якія загінулі ў часы Другой сусветнай вайны
